A alcaldesa de Tomiño, Sandra González, xefa da Oficina de Igualdade do Concello, fixo entrega o pasado luns dos premios do concurso de redacción sobre a muller traballadora convocado pola oficina entre os alumnos e alumnas de 6º curso de Primaria.

Nun acto celebrado no Salón de Plenos o pasado luns pola tarde, a rexedora municipal felicitou a cada un dos gañadores e gañadoras salientando os seus traballos e agradecendo a súa vontade de participar na convocatoria.

Os tres alumnos premiados foron, por esta orde, Sabela Sobrino de Santiago (1º  premio valorado en 100 euros), do CEIP Pintor Antonio Fernández, de Goián); Roi Serra Martínez (2º premio valorado en 75 euros) e Lorena Álvarez Rodríguez (3º premio valorado en 50 euros), ambos do CEIP de Tebra. Os tres galardoados destacaron nas súas composicións, que concursaron xunto a unha trintena de traballos, o papel da muller na sociedade desde diferentes puntos de vista e coincidindo na importancia de valorar máis o traballo que esta desempeña dentro e fora da casa.

 

     
A Concellaría de Benestar Social do Concello de Tomiño, que dirixe o centrista Pablo Baquero, está a por en marcha un proxecto de caracter experimental coa finalidade de previr condutas negativas nos estudantes da Ensinanza Secundaria Obrigatoria (ESO). Trátase da “Aula Excelente”, unha iniciativa innovadora na que os técnicos de Servizos Sociais contan coa colaboración do profesorado e alumnado do IES de Tomiño. 

Segundo explica Isabel Ayán, técnica educadora e pedagoga da concellaría, todas as aulas de ESO do instituto están acollidas a un concurso no que se reforzan as condutas positivas. Cada grupo parte cun total de cen puntos, que se van restando ou sumando segundo o comportamento do alumnado; por exemplo, réstanse puntos en caso de amonestacións escritas, expulsións, inasistencias e rendemento académico negativo da aula. O factor máis innovador da iniciativa sexa quizais que son os propios estudantes os que exerzan o control dos seus compañeiros dun xeito positivo, para que non sempre sexa o profesorado a figura de autoridade ante o alumno ou alumna.
 

O pavillón municipal de Goián acollerá a vindeira fin de semana unha feira de oportunidades (Outlet) na que un 40% dos expositores serán comercios de Tomiño do ramo téxtil, mobles, complementos, copistería, óptica, cosmética, etc.

A mostra conta coa colaboración da Asociación de Comerciantes de Tomiño, ADETO, e do Concello, que presta as instalacións.

A deputada socialista e portavoz de medio ambiente non Parlamento de Galicia presentou unha proposición non de Lei para que a Xunta de Galicia dote orzamentariamente dúas obras fundamentais no Concello de Tomiño:

- O tramo Carregal – Torrón do colector xeral que permitirá o acceso ao servizo de saneamento a mais de 4.000 persoas e que ten un presuposto de execución próximo a 1.500.000 euros. Este colector ten toda a tramitación administrativa resolta, contando cos pertinentes permisos sectoriais e coa declaración de urxente ocupación dos terreos.
 

O incremento poboacional experimentado polo municipio de Tomiño desde que comezou o século sitúao, cun 22,14% de crecemento, no ranking dos de maior incremento poboacional da provincia. Pero os datos son máis abafadores se se analiza a progresión do seu centro urbano e da parroquia de Santa María de Tomiño, na que se atopa.

O centro urbano do municipio rompe calquera estatística xa que contaba no 2000 con 369 veciños e en menos dunha década alcanzou os 1.107. O Seixo triplicou a súa poboación en nove anos e, a parroquia de Santa María tampouco queda á zaga, cun incremento do 47%. A consolidación do centro urbano débese tanto a movementos migratorios dentro do propio concello como doutros puntos da provincia, segundo explican o edil de Urbanismo e a rexedora, Sandra González.
 

Unha unidade móbil do Ministerio de Industria, Turismo e Comercio (Secretaría de Estado de Telecomunicaciones y para la Sociedad de la Información), visitará Tomiño o vindeiro día 10 de marzo, co fin de informar á cidadanía sobre as emisións da TDT e o apagón analóxico.

Os técnicos informarán aos veciños e veciñas que queiran achegarse ata a Praza do Seixo, en horario de 09.00 a 14.00 e de 16.30 a 18.30 horas.
 

 Os vindeiros 8 e 9 de maio terá lugar a “3ª Edición da Festa de Exaltación do Kiwi” organizada polo  concello, en colaboración con diversas entidades, entre as que se atopan a Asociación Profesional de Kiwicultores de Galicia e a Asociación de Empresarios e Comerciantes de Tomiño (ADETO).

A festa contempla a colocación de diversos stands e casetas, coa participación de empresas, asociacións veciñais e culturais que mostrarán e ofertarán produtos como mel, mirabeis, pan de millo, sobremesas e artesanía.

David Castro, de 33 anos de idade, foi un dos fundadores do clube Deportivo Miño-Teixugos de Tomiño. Competiu nas modalidades de slalom, kaiak polo e estilo libre onde participou nuns Campionatos de Europa coa Seleccion Española. Pero non era polo seu bo facer en competicion polo que David era unha referencia das Augas Bravas en toda a península ibérica, aunque tanto en España, Portugal como nos ríos dos Andes en Centroamerica ou en Africa, sabían da sua extraordinaria capacidade de navegar nos ríos maís complicados do mundo, David, recoñecido polo seu caracter afable, alegre, e as suas aventuras eran a referencia para os xoves palistas que miraban nel un heroe cercano e sonreinte.

Agora, o piragüismo galego esta de luto, os rios galegos tristes, e os teus amigos desolados.

Tal e como se fixo público recentemente, Tomiño foi un dos concellos cuxo proxecto de vivendas protexidas resultou desestimado por parte do Instituto Galego de Vivenda e Solo no seu deseño do Plan Sectorial de Solo Residencial.

Desde o goberno municipal de Tomiño consideran que esta decisión limitará e condicionará negativamente o futuro desenvolvemento do concello, un dos de maior crecemento no Sur de Pontevedra, toda vez que bota por terra o Plan Sectorial Galego de Solo Residencial impulsado pola Consellería de Vivenda e Solo na pasada lexislatura. Este plan permitiría a Tomiño dispor de 105.645 metros cadrados de solo urbanizable, no que se poderían construír unhas 297 vivendas protexidas, zonas verdes e parques públicos (45.000 m2); zonas de equipamentos (12.000 m2), aparcadoiros e novos viais.