O vindeiro sábado, 28 de novembro, celebrarase en Salcidos, no recinto do Camping Santa Tecla de A Guarda, a proba zonal de campo a través que promove a Secretaría Xeral para o Deporte da Xunta de Galicia a través do Servizo Provincial de Deportes.

Esta proba zonal abarca o territorio do Sur da provincia de Pontevedra, e están convocados escolares de centros e clubes dos concellos que cubren a franxa dende A Cañiza ata A Guarda, pasando por Ponteareas, Tui, O Porriño, Mos, etc.
 

Agárdase a participación de arredor de 700 nenos e nenas de idades comprendidas entre os 7 e os 14 anos.

Esta proba está  organizada pola Agrupación Deportiva Baixo Miño, en colaboración coa Concellería de Deportes do Concello de A Guarda.

A partir das 10:30 horas celebraranse as distintas carreiras, divididas nas categorías de Benxamíns, Alevíns, Infantís e Cadetes,  cun percorrido que discurre íntegramente dentro do camping. Os trazados e demáis detalles da proba pódense consultar na páxina web da Agrupación:  www.agrudebam.es.

Dende a Agrupación Deportiva Baixo Miño e o Concello de A Guarda queremos convidar a tódolos afeccionados ao atletismo nunha comarca que xa deu grandes figuras a asistir e animar nesta xornada na que ademáis de correr, os pequenos atletas poderán disfrutar de xogos e convivir nunha xornada con vocación de  festa do deporte.