A Concellería de Mocidade, presidida polo nacionalista Xaquín Villadangos, continúa coa súa programación de cursos e actividades gratuítas ofrecidas a través da OMIX (Oficina Municipal de Información Xuvenil).

É de destacar que todas as actividades ofertadas dende comezo de ano tiveron unha gran acollida por parte da mocidade quedando, en moitos casos, persoas en lista de espera debido á gran demanda.
 

Impartíronse cursos de parapente,  guitarra, lingua e cultura portuguesa, cociña, monitor/a de Tempo Libre, pandeireta, raid-orientación, creación audiovisual, fotografía e photoshop, e técnicas de busca de emprego, entre outros.

Na actualidade están rematándose en diferentes lugares cursos de agricultura ecolóxica, perfeccionamento de cestaría, e escalada, e a finais de mes comezará un de masaxe.

A programación formativa continuará no verán, con propostas coma mecánica do automóbil, inglés para viaxeiros (iniciación e medio), campamento urbano as mañás de xullo, e campamento de catro días a Ourense.

Ademais, a OMIX se brinda información e asesoramento á mocidade sobre diversos temas, coma bolsas e axudas, concursos, orientación pedagóxica, elaboración de CV e cartas de presentación, ofertas de emprego, saúde, turismo, carné xove, carné de alberguista, carné ISIC e Teacher; actividades que oferta a DXX (Dirección Xeral de Xuventude), renta de emancipación, campamentos, cursos de idiomas no estranxeiro, etc.