A segunda edición de Filminho “Festa do Cinema Galego e Portugués”, que se celebrará entre os días 15 e 19 de xullo, contará co apoio expreso de seis entidades, que esta mañá, asinaron en Goián o correspondente protocolo de cooperación. 

No acto estiveron presentes o director xeral de Xuventude e Voluntariado, Ovidio Rodeiro Tato; a alcaldesa de Tomiño, Sandra González Álvarez; o vice presidente da Câmara Municipal de Vila Nova de Cerveira, Joao Fernando Nogueira, o delegado da Região Norte do Instituto Português da Juventude, Vítor Días, e os presidentes das dúas asociacións A Morraceira (organizadora do festival), Xurxo González Rodríguez e André Manuel Gonçalves Martins.

Antes da sinatura do protocolo, único nas súas características polo seu carácter transfronteirizo, os responsables das entidades colaboradoras explicaron a súa implicación nunha iniciativa cultural como o Filminho.

A alcaldesa de Tomiño, Sandra González, felicitou aos organizadores do festival salientando a importancia de compartir un proxecto cultural no que “mozos e mozas de ambos países traballando xuntos é a imaxe que mellor expresa o espírito do evento”.

O director xeral de Xuventude, Ovidio Rodeiro Tato, pola súa banda, amosouse impresionado polo interese dun proxecto destas características e lembrou a súa intención de apoiar e reforzar o compromiso de cooperación entre as dúas rexións. “Onde haxa un xoven disposto a emprender proxectos coma este, a Dirección Xeral terá a prioridade de apoialo”, explicou.

Tamén os representantes da Cámara Municipal de Vilanova de Cerveira e da Região Norte do Instituto Português da Juventude, coincidiron na vontade de impulsar iniciativas culturais e sociais coma a de Filminho, “que permiten afundar nas relacións de amizade entre as dúas rexións”.

Ambos cualificaron ao festival coma un desafío para os organizadores e lembraron o éxito acadado na primeira edición.
 

Os organizadores, pola súa banda, agradeceron o apoio recibido, incidindo na necesidade de producir material oudiovisual da rexión que dea conta do que acontece nestes lugares. André Martíns, director de Filminho, salientou a relevancia dun evento cultural coma este, tamén na súa faceta social e humana.

Xurxo González pola súa parte, adiantou o esquema da programación deste ano, salientando as seccións competitivas; unha dedicada ao cinema miñoto e outra máis xeral, titulada Gran Premio Filminho. Entre ambas reunirán máis de cen filmes de creadores novos na súa meirande parte.

Outras seccións a destacar serán unha retrospectiva de Edgar Pera, cineasta portugués cun traballo experimental moi interesante, e os Clásicos Miñotos, nos que se presentará unha curta de Luís Galvao Telles, titulada “Entremés famoso sobre a pesca do río Miño”; unha cinta de 1974 recuperada especialmente para o festival.