Primeiro Feijoo, despois Rajoy e, de novo onte, o delegado provincial José Manuel Cores Tourís, volveu ratificar a intención da Xunta de retomar o proxecto inicial para a vía de alta capacidade do Baixo Miño.

Fíxoo en Tomiño, durante a visita institucional que realizou ao Concello e na que se entrevistou co goberno local, do mesmo xeito que fixo fai unhas semanas cando realizou a súa primeira toma de contacto con todos os alcaldes da comarca. Sobre a mesa, e segundo explicou tras o encontro a rexedora, Sandra González, falouse dalgúns dos temas máis importantes para o futuro inmediato do municipio tomiñés.

A alcaldesa expúxolle en primeiro lugar a necesidade de solucionar o problema que se sofre no centro de saúde pola falta dun sistema de refrixeración. Sandra González sinalou que o delegado se comprometeu a interesarse persoalmente pola situación.

Os membros do equipo de goberno trasladaron ao delegado a súa preocupación polos proxectos anunciados, comprometidos ou en execución, sobre os que lle prepararon un dossier.

Entre eles, confirmou a rexedora, o parque empresarial de Tomiño, a piscina municipal, a gardería de Goián ou o último tramo do colector. Sobre a vía de alta capacidade, a alcaldesa reiteroulle a necesidade de que exista unha comunicación fluída entre a Xunta e o goberno municipal de Tomiño.

FONTE: lavozdegalicia