Hoxe venres terá lugar o tradicional desfile de Entroido de Tomiño “Venres de Foliada”, un dos máis populosos da comarca e no que participarán este ano máis de 1500 persoas.

A Concellaría de Cultura, Educación e Participación Veciñal, organizadora do evento, confirmou a participación de 26 comparsas con carroza e outras seis sen carroza, ademais de varias rondallas, charangas e treboadas que confiren ao espectáculo gran dinamismo e sabor popular. 

O percorrido terá a súa saída ás 22.00 horas no torreiro de festas do Alivio, baixará pola rúa Gondomar, xirará na rúa A Guarda ata a Praza do Seixo e rematará na rúa República Arxentina. 

Entre as numerosas comparsas inscritas no desfile figuran as agrupacións locais “Estrelas da Noite”, “Revolution Show”, “Luces de Tomiño”, “Os Terribles de Tebra” e “Abanico de Colores”, “Os do Cristo”, “A Troula”, “Troula Vikinga”, “As Meigas”, “Os anos de Michael”, “Ceibe”, “El polvorete”, “Xa estamos nela”, “E din que hai crise”, que irán acompañadas por outras recoñecidas comparsas das comarcas do Baixo Miño, Louriña, Vigo e zona de influenza.